Passivmitgliedschaft

 

Syt 2009 gits bi de Batallioonsglunggis d Möglichkeit Passivmitglied zwärde!

 

 

Du bisch an dr Basler Fasnacht intrèsiert und mèchtsch gäärn e jungi und ufstrebendi Clique ùnderstytze? Wùnderbar! Im Folgende wäärde mir uns kùùrz vorstèlle und dir brèzyys äggschblyziere was mit dim Stùtz basiert:

 

 

Wär mir sin:

 

Mir geehn zrugg ins Jòòr zwaidaussigundfünf. Drey Frinde hän sich mit eme Zytigswäägeli und aim Sagg Räppli ùff die drey scheenschte Dääg zwäägmacht. Es isch pfùndig gsieh und dòòrùm hän sie sich au im drùffolgende Jòòr entschiede nomol zämme unterwäggs zsieh.

 

Mit dr Zyt isch dä Waage grösser und grösser worde und au d Räpplisägg hän sich vervielfacht.

 

Zämmesetztig vo dr Clique het grossi Veränderige erläbt, aaber mir häns allewyyl gschafft èppis neis uf d Bei zstelle. Dr ganzi Prozäss kasch in Fòòrm vo Bilder im Menu oobe aaluege.

 

 

Im 2016 hän mir und unseri Binggis uns zämmegschlosse. Jètze sin mir e Clique vo rund nün grosse und finf glaine Nase.

 

 

Was du kasch bitrage:

 

D Fasnacht isch de Höhepunkt vom Jòòr fir uns. Doch laider isch das mit viel Ùffwand und vor allem Kèschte verbunde. Do mir nid offiziell im Cortège sin, bikööme mir au kaini Subventione. Drùm sin mir uf d Biträg vo de Passivmitglieder und wieteri finanzielli und materielli Zuestüpf agwiese. Obwohl mir eher e glaini Clique sin, hän mir rund 100 Passivmitglieder wo uns efang unterstütze. Es würd uns ghèèrig fraie, wenn mir ab jètz au di derzue zèlle dèèrfe!

 

 

Was es bringt:

 

Karma! Und du dreisch mit dim Biträg zum kulutrelle Lääbe z Basel bi, zumindest für drey Dääg. Du betriebsch Jùùgendfèrderig, damit d Basler Fasnacht au in Zuekunft lebändig blyybt.

 

Du bechunsch e Zoggeli in Form vo eme Schlisselahänger. Dòòdermit kasch di au wääred de räschtliche 362 Dääg im Jòòr als Unterstützer vo dere tolle Clique oute!

 

Wääred dr Fasnacht kunsch in Gnùss vo eme Apèro, exklusiv fir unseri Passivmitglieder. Das heisst du kasch in Rueh unsere Waage bestuune, d Atmosphäre vo dr Fasnacht isuge und muesch nid di Moonedsghalt an de Ässensständ liege lo sòndern wirdsch vo uns verpfläägt.

 

 

Was es kòschtet:

 

Nodäm alles duregläse hesch kèmme mir jètze zum Dail wo di wòòrschyynig am maischte intrèsiert. Dr Passivmitgliederbitrag wär 20.- CHF pro Person oder 30.- pro Famyylie.

 

Zustüpf sin nadyyrlig wie bereits erwähnt stets willkomme.

 

 

Danggscheen vyylmol!